اسلام آباد: وفاقی وزیر مراد سعید کو چائے پلانے پر عمرکوٹ سندھ کا ایک ڈھابے والا مشکل میں پڑ گیا ہے۔
تفصیلات کے مطابق سندھ کے شہر عمرکوٹ میں وفاقی وزیر مراد سعید اور گورنر سندھ عمران اسماعیل کو چائے پلانے پر ایک غریب ڈھابے والا زیر عتاب آ گیا۔
مراد سعید عمر کوٹ جلسے اور ریلی کے بعد ڈھابے پر کچھ دیر کے لیے رُکے تھے، اس حوالے سے 5 ویڈیوز سوشل میڈیا پر پھیلتے ہی مراد سعید کا جوابی رد عمل بھی آ گیا ہے۔
مراد سعید نے ٹوئٹ کرتے ہوئے کہا کہ پرچی چیئرمین کی جمہوریت دیکھیے، مجھےاورگورنر سندھ کو چائے پلانے پر ایک غریب کا ڈھابا غیر قانونی ٹھہرا۔
پرچی چیرمئین کی “جمہوریت” دیکھئے ایک غریب بندے کا ڈابہ آج غیر قانونی ہوا کہ مراد سعید اور گورنر کو چائے کیوں پلائ ؟سندھ میں حکومتی مافیا عوام کا خون چوس رہا، زرداری کے “بہادر بچے” وردی میں موت بانٹ رہے اور سوال پوچھنے والے مارے جاتے ہیں ۔ ۳۰ کو لاڑکانہ میں ملاقات ہوگی انشاءاللہ pic.twitter.com/NHLjVScLOL
— Murad Saeed (@MuradSaeedPTI) December 18, 2021
مراد سعید کا کہنا تھا کہ سندھ میں حکومتی مافیا عوام کا خون چوس رہا ہے، اور زرداری کے ‘بہادر بچے’ وردی میں موت بانٹ رہے ہیں، سوال پوچھنے والے مارے جاتے ہیں۔
مراد سعید نے ٹوئٹ میں یہ بھی لکھا کہ 30 دسمبر کو لاڑکانہ میں ملاقات ہوگی۔
ہائی وے پر قائم ڈھابے کے مالک شہری نے ویڈیو میں بتایا کہ 5 دسمبر کو جلسے میں آئے مراد سعید، گورنر سندھ اور دیگر کو انھوں نے چائے پلائی تھی، ان کے جانے کے بعد ہائی وے افسران نے آ کر پیپلز پارٹی کے جھنڈے اتارنے کا کہا اور بہ صورت دیگر ڈھابا بند کرنے کی دھمکی دی۔
