کراچی : شیرشاہ پراچہ چوک پر دھماکے میں مرنے والوں کی تعداد 17 ہوگئی، ریسکیو اہلکاروں نے مزید دو لاشیں نکال لیں۔
کراچی کے علاقے شیرشاہ میں ہونے والے گیس لیکج دھماکے میں مرنے والوں کی تعداد میں اضافہ ہوتا جارہا ہے، ریسکیو اہلکاروں نے ملبے سے مزید دو افراد کی لاشیں نکال لیں۔
ریسکیو ذرائع کا کہنا ہے کہ دونوں افراد کی لاشوں کو نالے سے نکالا گیا ہے جس کے بعد جاں بحق افراد کی تعداد 17 ہوگئی۔
یاد رہے کہ کراچی کے علاقے شیر شاہ میں ہونے والے دھماکے میں نجی بینک کی عمارت مکمل طور پر تباہ ہو گئی اور اس واقعے میں تحریک انصاف کے رہنما اور رکن قومی اسمبلی عالمگیر خان کے والد بھی جاں بحق ہوئے ہیں۔
دھماکے کی تحقیقات کے لیے خصوصی ٹیم تشکیل دے دی گئی ہے جس کی سربراہی ایس پی انویسٹی گیشن کریں گے۔
پولیس حکام کا کہنا ہے کہ تحقیقاتی ٹیم ہر پہلو سے دھماکے کی تحقیقات اور جائزہ لے گی۔
پولیس کے مطابق بی ڈی یو رپورٹ اور ابتدائی تحقیقات سے دھماکا گیس لیکیج کا لگتا ہے، دھماکے کا مقدمہ بھی درج کیا جارہا ہے، ذمہ داروں کے تعین کے لیے ٹیم دیگر اداروں کی خدمات لے گی۔
