اسلام آباد : سیالکوٹ میں گزشتہ دنوں ہونے والے افسوسناک واقعہ پر معروف مذہبی شخصیت مولانا طارق جمیل نے اپنے دلی افسوس اور دکھ کا اظہار کیا ہے۔
تفصیلات کے مطابق مولانا طارق جمیل اور علامہ طاہر اشرفی نے سری لنکن ہائی کمیشن کا دورہ کیا، جہاں انہوں نے سری لنکن ہائی کمشنر سے خصوصی ملاقات کی۔
اس موقع پر گفتگو کرتے ہوئے ،مولانا طارق جمیل نے کہا کہ سری لنکن سفیر کو کہا ہم معافی مانگنے آئے ہیں، ہمارا دین ظلم و جبر کی بالکل اجازت نہیں دیتا۔ سری لنکا کے عوام سے ہاتھ جوڑ کر معافی مانگتا ہوں، ہم سری لنکا والوں کے سامنے شرمندہ ہیں۔
مولانا طارق جمیل کا مزید کہنا تھا کہ اسلام کا نام سلامتی ہے، ایمان کا مطلب امن ہے، ایک انسان کا قتل پوری انسانیت کا قتل ہے کسی کو حق حاصل نہیں وہ کسی کو جلائے۔ صرف اللہ کو حق ہے۔ اسلام محبت کا درس دیتا ہے۔
مولانا طارق جمیل نے لوگوں سے قرآن مجید اورحضوراکرم ﷺ کی سیرت پڑھنے کی درخواست کی۔مولانا طاہر اشرفی کا کہنا تھا کہ سیالکوٹ میں جو افسوسناک واقعہ پیش آیا میں اور مولانا طارق جمیل اسی سلسلسے میں تعزیت کے لیے آئے ہیں۔
انہوں نے کہا کہ فیکٹری انتظامیہ نے ان کے دو بچوں کے تمام اخراجات اٹھانے کا فیصلہ کیا ہے اور فیکٹری میں ایک سری لنکا شہری کو بھی نوکری دی گئی ہے۔
اس موقع پر سری لنکن سفیر نے کہا کہ فیکٹری نے پریانتھا کمارا کے دو بچوں کے اخراجات اٹھانے کا فیصلہ کیا، فیکٹری میں ایک سری لنکن شہری کو نوکری دی گئی، پاکستانی حکومت کی جانب سے لیے گئے اقدامات پر مطمئن ہیں۔
