خیرپور: صوبہ سندھ کے ضلع خیرپور میں واقع شاہ عبداللطیف یونیورسٹی میں پیش آئے واقعے پر طلبا سراپا احتجاج ہیں اور انہوں نے اعلیٰ حکام سے بڑا مطالبہ کردیا ہے۔
اے آر وائی نیوز کے مطابق رانی پور قومی شاہراہ پر سات سے زائد ملزمان نے اسلحہ کے زور پر بس کو روکا اور طالبہ کو اغوا کرنے کی کوشش کی، اس دوران طلبا نے مزاحمت کی تو انہیں بھی تشدد کا نشانہ بناتے ہوئے زخمی کرڈالا، جس کے نتیجے میں سات طلبہ زخمی ہوگئے ہیں۔
پولیس ذرائع کا کہنا ہے کہ ملزم صفدر وسان یونیورسٹی کا ہی طالب علم ہے، جس نے اپنے بیرونی ساتھیوں کے ساتھ مل کر بس کو روکا اور طالبہ کو اغوا کرنے کی کوشش کی، واقعے میں زخمی طلبا کو طبی امداد کے لئے اسپتال منتقل کردیا گیا ہے۔
یہ بھی پڑھیں: خیرپور میں بربریت کی انتہا: ننھا طالب علم مبینہ زیادتی کے بعد قتل
طلبہ کے اغوا اور ساتھیوں کے زخمی ہونے کی اطلاع پر یونیورسٹی طلبا شدید مشتعل ہوگئے اور انہوں نے رانی پور کے مقام پر قومی شاہراہ پر دھرنا دے دیا، احتجاجی طلبہ کا موقف ہے کہ فوری طور پر واقعے میں ملوث ملزمان کو گرفتار کیا جائے اور انہیں قرار واقعی سزا دی جائے جب ملزمان گرفتار نہیں ہونگے، ہمارا احتجاج جاری رہے گا۔
متاثر طالبہ کا بیان
واقعے سے متعلق طالبہ خوشبو بھٹی نے بتایا کہ صفدر وسان زبردستی بس کو روک کر مسلح لڑکوں کے ساتھ سوار ہوا، ملزمان نے بس میں سوار طالبات کے ساتھ بدتمیزی کی، جس کے خلاف یونیورسٹی طلبہ احتجاج کر رہے ہیں۔
ایس ایس پی کا نوٹس
شاہ عبداللطيف یونیورسٹی میں طلبا سےپیش آئےواقعےپر ایس ایس پی ملک ظفراقبال نے نوٹس لے لیا ہے اور متعلقہ حکام کو 24 گھنٹے کے اندر رپورٹ دینے کے احکامات دئیے گئے ہیں، انکوائری کےبعدمزید سخت قانونی کارروائی کی جائےگی۔
معاملے کی انکوائری ایس پی ہیڈ کوارٹر محمد انوربگٹی کو دی گئی ہے، ایس ایس پی کا کہناتھا کہ طلبا ہمارا مستقبل ہیں اور انکی حفاظت ہمارا اولین فرض ہے۔
