کراچی: شہر قائد میں کرونا وائرس کے سب سے زیادہ متعدی ویرینٹ اومیکرون کے 6 مشتبہ کیسز سامنے آ گئے ہیں۔
ذرائع محکمہ صحت کے مطابق 6 ایسے افراد بیرون ملک سے کراچی پہنچے ہیں، جن میں ابتدائی طور پر کرونا وائرس کی تصدیق ہو گئی ہے۔
محکمہ صحت کے ذرائع کا کہنا ہے کہ مذکورہ افراد کو قرنطینہ سینٹر منتقل کر دیا گیا ہے، ان میں سے 4 افراد جنوبی افریقہ اور 2 برطانیہ سے کراچی پہنچے ہیں۔
ذرائع کے مطابق کرونا متاثرہ افراد کے خون کے نمونے جینوم سیکویسنگ کے لیے نجی اسپتال پہنچا دیے گئے، اور اومیکرون کی تصدیق کے لیے جینوم سیکویسنگ شروع کر دی گئی ہے۔
بلوچستان میں اومیکرون کے 12 مشتبہ کیسز سامنے آنے پر ہل چل
یاد رہے کہ ایک ہفتہ قبل شہر قائد میں اومیکرون کا دوسرا کیس رپورٹ ہوا تھا ، تاہم متاثرہ شخص قرنطینہ سے فرار ہوگیا تھا، پینتیس سالہ شخص مزمل برطانیہ سے آیا تھا، تاہم صدر ٹاؤن کی حدود کھارادر کے رہائشی کو دوبارہ پکڑا گیا اور قرنطینہ کر دیا گیا۔
ادھر صوبہ بلوچستان میں بھی گزشتہ روز 12 مشتبہ افراد کے اومیکرون میں مبتلا ہونے کا خدشہ ظاہر کیا گیا ہے، اے آر وائی نیوز کے مطابق بلوچستان کے علاقے قلات میں بارہ افراد کے اومیکرون سے متاثر ہونے کی اطلاعات سامنے آئی ہیں۔
