نئی دہلی : بھارتی ریاست اترپردیش میں پیوش جین نامی تاجر کے گھر سے 468 کروڑ روپے سے زائد رقم، 23 کلوگرام سونا اور چھ کروڑ روپے مالیت کا چندن کا تیل برآمد ہوا ہے۔
بھارتی حکام کا کہنا ہے کہ ریاست اترپردیش کے شہر کانپور میں انکم ٹیکس حکام کے چھاپے میں ایک تاجر کے گھر سے برآمد ہونے والی کرنسی کی گھنتی مکمل کرلی گئی ہے جس کے بعد پیوش جین پر ٹیکس چھپانے کے جرم میں 124 کروڑ روپے سے زائد جرمانہ عائد کیا گیا ہے۔
حیران کن طور پر پیوش جین کے گھر سے 4 ارب 68 کروڑ روپے سے زائد برآمد ہوئے ہیں جن کی گنتی کئی روز میں مکمل کی گئی ہے۔
بھارتی تاجر کے وکیل نے عدالت سے درکواست کی ہے کہ 124 کروڑ روپے ٹیکس وصولی کے بعد باقی رقم موکل کو واپس کی جائے تاہم اسپیشل پبلک پراسیکیوٹر نے کیس کا فیصلہ آنے تک رقم حکومتی اکاؤنٹ میں رکھنے کا اعلان کردیا۔
خیال رہے کہ سینٹرل بورڈ آف ڈائریکٹ ٹیکس اینڈ کسٹمز (سی بی آئی سی) جمعے کو تاجر پیوش جین سے منسلک مقامات (گھر، دفتر اور فیکٹریوں) ٹیکس چوری کے الزام میں چھاپہ مارا تھا۔
انھوں نے کہا یہ سی بی آئی سی کی تاریخ میں سب سے بڑی کارروائی ہے، اس کیس میں ملوث تاجر پیوش جین 14 روزہ جسمانی ریمانڈ پر پولیس کی تحویل میں ہیں۔
رپورٹ کے مطابق ڈائریکٹوریٹ جنرل جی ایس ٹی نے 120 گھنٹے کے چھاپے کے دوران ضبط کیے گئے خزانے کی گنتی کے لیے بھارت کے مرکزی بینک سے مدد لی اور پھر بینک کی مشینوں کی مدد سے رقم کی گنتی کی گئی۔
