کراچی : شہر قائد کی معروف شخصیت اور سماجی تنظیم جے ڈی سی کے روح رواں ظفراقبال کا کہنا ہے کہ میرا سیاست میں آنے کا کوئی ارادہ نہیں۔
یہ بات انہوں نے اے آر وائی نیوز کے پروگرام "ہمارے مہمان” میں میزبان فضا شعیب سے خصوصی گفتگو کرتے ہوئے کہی۔
ظفراقبال نے کہا کہ مجھے پہلے بھی کئی بار مختلف جماعتوں کی جانب سے ایم این اے یا ایم پی اے کی پیشکش ہوچکی ہے لیکن میں اپنے سماجی کاموں میں بے حد مصروف ہوں۔
انہوں نے بتایا کہ میں بھی تو صرف سماجی کام کررہا ہوں تو مجھے دھمکی آمیز کالیں آتی ہیں کہ تمہاری وجہ سے لوگ مر رہے ہیں ہم کسی بھی مافیا کیخلاف بولیں تو ایک نیا سلسلہ شروع ہوجاتا ہے۔
ایک سوال کے جواب میں ظفر اقبال نے بتایا کہ ہم فوڈ پاپا کے نام سے ایک نئی ایپلی کیشن متعارف کرارہے ہیں کیونکہ غیر ملکی کمپنیاں ہمارے لوگوں سے بہت ذیادتی کر رہی ہیں، مثال کے طور پر اگر کوئی اپنی ڈش بناتا ہے تو اس کا چالیس فیصد منافع خود رکھتی ہیں۔
انہوں نے بتایا کہ اس پروگرام کے تحت ہم 40سے 45ہزار لوگوں کو روزگار دیں گے، ہمارے ساتھ کراچی کے نوجوان جڑے ہوئے ہیں جو ہم سے رابطے میں ہیں۔
