لاہور ہائی کورٹ نے بیرونی قرضوں کی تفصیلات کی فراہمی کیلئے درخواست پر مجموعی طور پر حاصل کردہ قرضوں کی تفصیلات مانگ لی ہیں۔
تفصیلات کے مطابق لاہور ہائیکورٹ کے جسٹس شاہد کریم نے منیراحمد کی درخواست پر سماعت کی جس میں ملکی قرضوں کی تفصیلات فراہم نہ کرنے اور جی ڈی پی کے مقررہ حد سے زیادہ قرضے لینے کے اقدام کو چیلنج کیا گیا۔
عدالت نے ہدایت کی کہ یہ بتایا جائے کہ جی ڈی پی کے مقررہ حد سے زیادہ کتنا قرض لیا گیا ہے، درخواست گزار کے وکیل اظہر صدیق نے بتایا کہ ملکی قوانین کے تحت جی ڈی پی کے ساٹھ فیصد سے زیادہ کے قرضے نہیں لیے جاسکتے لیکن اس کے باوجود اس قانونی حد کو پار کیا گیا۔
درخواست گزار کے مطابق بیرونی قرضے لینے کے قوانین میں اسحاق ڈار نے ردوبدل کیا، وکیل نے استدعا کی کہ مجموعی طور پر بیرونی قرضہ کی تفصیلات طلب کی جائیں، درخواست پر مزید کارروائی دو فروری کو ہوگی۔
