پشاور: صوبہ خیبر پختونخواہ میں کرونا وائرس کی قسم اومیکرون کے مزید 37 نئے کیسز سامنے آگئے جس کے بعد پختونخواہ میں اومیکرون کیسز کی تعداد 145 ہوگئی۔
تفصیلات کے مطابق صوبہ خیبر پختونخواہ میں کرونا وائرس کی قسم اومیکرون کے مزید 37 نئے کیسز سامنے آگئے، محکمہ صحت کا کہنا ہے کہ 37 کیسز میں سے 18 کا تعلق پشاور سے ہے۔
ترجمان محکمہ صحت کا کہنا ہے کہ اومیکرون کا شکار 37 افراد میں 14 خواتین بھی شامل ہیں۔ صوبے میں اومیکرون کیسز کی تعداد 145 ہوچکی ہے۔
خیال رہے کہ پاکستان میں کرونا وائرس خطرناک صورتحال اختیار کرتا جارہا ہے، نیشنل کمانڈ ایںڈ آپریشن سینٹر کے مطابق گزشتہ 24 گھنٹے کے دوران ملک بھر میں کووڈ 19 کے 5 ہزار سے زائد کیسز رپورٹ ہوئے ہیں۔
ملک بھر میں کرونا وائرس کے مثبت کیسز کی شرح 9.48 ریکارڈ کی گئی ہے۔
مذکورہ نئے کیسز کے ساتھ ملک بھر میں کرونا وائرس کے مثبت کیسز کی تعداد 13 لاکھ 38 ہزار 993 ہوچکی ہے جن میں سے 12 لاکھ 65 ہزار 239 افراد صحت یاب ہوچکے ہیں۔
