لاہور: وزیرِاعظم نواز شریف کو نا اہل قرار دینے کے لیے لاہور ہائی کورٹ میں انٹرا کورٹ اپیل دائر کر دی گئی ہے ۔
درخواست انصاف لائرز فورم کے سینئر نائب صدر گوہر نواز سندھو کی جانب سے دائر کی گئی، جس میں مؤقف اختیار کیا گیا کہ وزیرِاعظم نواز شریف نے فوج کی ثالثی کے معاملے پر قوم سے جھوٹ بولا اور فوج کو بدنام کرنے کی کوشش کی ہے جبکہ آئی ایس پی آر نے وضاحت کر دی ہے کہ حکومت نے آرمی چیف سے مصالحت کی درخواست کی تھی۔
موقف میں کہا گیا ہے کہ قومی اسمبلی میں جھوٹ بولنے کے باعث وزیرِاعطم نواز شریف باسٹھ تریسٹھ کی شرط پر پورا نہیں اترتے، اس لئے انہیں نااہل قرار دیا جائے۔
درخواست گزار کے مطابق لاہور ہائی کورٹ کے سنگل بنچ نے یہ درخواست مسترد کر دی جبکہ اس حوالے سے اہم آئینی نکات اور حقائق کو نظر انداز کیا گیا ہے، اس لیے عدالت سنگل بنچ کا فیصلہ کالعدم اور وزیراعظم کو نااہل قرار دے۔
واضح رہے قومی اسمبلی میں خطاب کے دوران وزیراعظم نواز شریف کا کہنا تھا کہ تحریک انصاف اور عوامی تحریک کی جانب سے درخواست پر فوج کو ثالثی کا کردار ادا کرنے کیلئے حکومت نے نہیں کہا تھا۔
