شمالی کیرولائنا: امریکی محققین نے ایک ریسرچ کے نتائج میں انکشاف کیا ہے کہ مونگ پھلی اور اس سے تیار کردہ مصنوعات کو نوزائیدہ بچوں کی غذا میں شامل کرنا ان کی بتدریج نشوونما میں اضافے اور مختلف الرجیز سے بچنے کا سبب بنتا ہے۔
تفصیلات کے مطابق دی لانسیٹ میں شائع ہونے والے ایک تحقیقی مطالعے میں کہا گیا ہے کہ ابتدائی زندگی میں بچوں کی خوراک میں مونگ پھلی کو شامل کرنے سے مستقبل میں مختلف الرجیز کو روکنے میں مدد مل سکتی ہے۔
ریسرچ اسٹڈی میں 146 ایسے بچوں کو شامل کیا گیا تھا جنھیں مونگ پھلی سے الرجی تھی، جن کی عمریں ایک سے تین کے درمیان تھیں، اس گروپ میں سے 96 بچوں کو روزانہ مونگ پھلی کا پروٹین پاؤڈر دیا جاتا تھا، جس کی خوراک 6 مونگ پھلی کے برابر تھی۔
جب کہ دوسرے گروپ کے بچوں کو جو کے آٹے کا پلیسبو دیا گیا جو کہ چھ ماہ بعد حساسیت کا شکار ہوئے اور اس میں الرجی کی حد زیادہ تھی۔
جن بچوں کو مونگ پھلی کا پاؤڈر ملا انھوں نے الرجی میں کمی ظاہر کی یعنی اس تھراپی کے ختم ہونے کے چھ ماہ بعد کوئی الرجک رد عمل نہیں ہوا۔
نتائج سے یہ بات واضح ہوئی کہ اگر پیدائش کے چھ ماہ بعد ہی بچوں کو مونگ پھلی سے تیار کردہ مصنوعات کھانے کا عادی کیا جائے تو وہ مونگ پھلی سے ہونے والی الرجی سے متاثر نہیں ہوتے۔
