کراچی: بلوچستان عوامی پارٹی (باپ) میں ایک بار پھر اختلافات کی خبریں زیرگردش ہیں اور سیاستدانوں کی اہم ملاقاتیں جاری ہیں۔
اے آر وائی نیوز کے مطابق بلوچستان عوامی پارٹی میں عہدے حاصل کرنے کی رسہ کشی جاری ہے، جس کے باعث اختلافات نے جنم لیا ہے، عہدے حاصل کرنے کی غرض سے بلوچستان سے تعلق رکھنے والے اہم سیاستدانوں کی کراچی میں ملاقاتیں جاری ہیں۔
چند ماہ قبل سابق وزیراعلیٰ بلوچستان جام کمال وزارت عظمیٰ کے عہدے سے ہاتھ دھونے کے بعد پارٹی صدر سے بھی محروم ہوگئے تھے اور ان کی جگہ ظہور بلیدی کو بلوچستان عوامی پارٹی( باپ ) کا صدر بنایا گیا تھا لیکن اب کئی پارٹی ارکان نے ان پر عدم اعتماد کا اظہار کردیا ہے۔
یہ بھی پڑھیں: وزیراعلیٰ بلوچستان جام کمال نے استعفیٰ دے دیا
یہ اطلاعات زیر گردش ہیں کہ ان ناراض ارکان نے سینیٹر کہدہ بابر کو بلوچستان عوامی پارٹی کا صدر بنانےکے لیے لابنگ شروع کردی ہے، سینیٹر کہدہ بابر کو ’’باپ‘‘پارٹی کا سربراہ بنانےکیلئے اجلاس آئندہ ہفتے بلائے جانے کا امکان ہے۔
یاد رہے کہ بلوچستان عوامی پارٹی کو اس قسم کی صورت حال کا سامنا گذشتہ سال اکتوبر میں بھی کرنا پڑا تھا جب بلوچستان اسمبلی میں اس وقت کے وزیراعلیٰ جام کمال کے خلاف عدم اعتماد کی قرارداد پیش کی گئی تھی اور بلوچستان عوامی پارٹی (بی اے پی) کے ناراض اراکین نے ظہور احمد بلیدی کو پارٹی کا پارلیمانی لیڈر نامزد کیا تھا۔
