ریاض : مکہ مکرمہ میونسپلٹی نے عوامی مقامات میں خلاف ورزیوں اور جرمانوں کا شیڈول جاری کردیا ہے، سعودی ذرائع ابلاغ کے مطابق خلاف ورزی دہرانے پر جرمانے کی رقم دوگنا ہوجائے گی۔
اس حوالے سے ترجمان میونسپلٹی نے کہا ہے کہ پارکوں میں آگ جلانا قواعد وضوابط کی خلاف ورزی اور قابل سزا عمل ہے جس پر4000 ریال جرمانہ عائد ہوگا۔
- Advertisement -
واکنگ ٹریک میں چلتے ہوئے یا گاڑی میں سوار کھڑکی سے کچرا پھینکنے پر200 ریال، چاکنگ کرنے پر 500ریال اور عوامی مقامات میں بغیر اجازت کے ٹھیلے لگانے پر ایک ہزار ریال جرمانہ ہوگا۔
بلدیہ نے کہا ہے کہ بچوں کے جھولوں کو خراب کرنے پر 4 ہزار ریال اور پودے، گل بوٹے یا گھاس اکھاڑنے پر 10 ہزار ریال جرمانہ ہوگا۔
بلدیہ نے کہا ہے کہ عوامی مقامات سب کی ملکیت ہیں جن کی حفاظت کرنا اور جگہ کو اسی حالت میں چھوڑنا جس حالت میں وہ پہلے تھی، سب پر لازم ہے۔
