ایتھنز: یونان کے ساحل کے قریب آگ کے شعلوں میں گھرے بحری جہاز میں سے ایک لاپتا شخص زندہ مل گیا۔
تفصیلات کے مطابق یونان کے ساحل کے قریب آتش زدہ فیری سے اتوار کو ایک لاپتا شخص کو بچا لیا گیا، 11 مزید لا پتا افراد کی تلاش جاری ہے۔
یونان کے کوسٹ گارڈز کے ترجمان کا کہنا ہے کہ یہ شخص فیری کے پچھلے حصے میں تھا، جہاں سے اسے بہ حفاظت نکالا گیا، ہفتے کو ریسکیو کیے گئے 2 مسافروں میں سے ایک کا نام مسافروں کی لسٹ میں نہیں تھا اس لیے اسے پناہ گزین سمجھا گیا۔
واضح رہے کہ اٹلی کی اس فیری میں 290 افراد سوار تھے، جب کہ 153 ٹرک اور 32 کاریں بھی موجود تھیں، جہاز نے جمعے کو یونان سے سفر کا آغاز کیا اور تین گھنٹے بعد اس میں آگ بھڑک اٹھی، جو ابھی تک بجھائی نہیں جا سکی ہے، یونانی کوسٹ گارڈز اور دیگر کشتیوں نے 280 افراد کو بچا لیا ہے۔
#VIDEO A passenger was on Sunday found alive aboard a ferry that has been ablaze off Greece for three days, reviving hopes that several more missing people may have survivedhttps://t.co/s7lXzAr5Tm pic.twitter.com/gInUxF4OJK
— AFP News Agency (@AFP) February 20, 2022
حکام کا کہنا ہے کہ شعلوں اور دھوئیں میں گھرے بحری جہاز کشتیوں کے ذریعے آہستہ آہستہ ساحل پر لایا جا رہا ہے، آگ بجھانے والا عملہ مسلسل آگ بجھانے کی کوشش کر رہا ہے لیکن آگ پھر کسی نہ کسی حصے سے دوبارہ بھڑک اٹھتی ہے۔
نیز ریسکیو کا عملہ دیگر لاپتا مسافروں کی تلاش کر رہا ہے لیکن جہاز میں پہنچنا ابھی ممکن نہیں ہے۔ حکام کا کہنا ہے کہ ریسکیو کیے جانے والوں میں البانیہ، ترکی، بلغاریہ، رومانیہ، یونان، اٹلی اور لیتھوینیا کے شہری شامل ہیں۔
