فرانسیسی کمپنی نے پروٹین پر مبنی ویکسین تیار کرلی جو کرونا کی سنگین شدت کے خلاف سو فیصد مؤثر ہے۔
غیر ملکی میڈیا کے مطابق فرانسیسی کمپنی نے دو خوراکوں پر مشتمل ایسی کرونا ویکسین تیار کی ہے جو کرونا کی سنگین شدت کے خلاف اور اسپتال میں داخلے کے خلاف انتہائی مؤثر قرار دی جارہی ہے۔
اس ویکسین کو کلینیکل ٹرائل کے بعد امریکی فوڈ اینڈ ڈرگ ایڈمنسٹریشن (ایف ڈی اے) اور یورپین میڈیسینز ایجنسی (ای ایم اے) کے پاس منظوری کے لیے پیش کیا گیا ہے۔
کمپنی کا کہنا ہے کہ ہمیں اپنی ویکسین پر پورا اعتماد ہے، ویکسین مارکیٹ میں آنے کے بعد حالات میں اہم کردار ادا کرے گی۔
دیگر کووڈ 19 ویکسینز کی طرح اس نئی ویکسین میں بھی کورونا وائرس کے اسپائیک پروٹین کو ہی ہدف بنایا جاتا ہے، مگر ایم آر این اے کے برعکس اس میں اسپائیک پروٹین کا تدوین شدہ ورژن قوت مدافعت بڑھانے کے لیے استعمال کیا گیا ہے۔
ڈیٹا کے مطابق یہ ویکسین علامات والی بیماری سے بچانے کے لیے 57.8 فیصد مؤثر ہے جو ایم آر این اے ویکسینز سے کم ہے مگر بیماری کی سنگین شدت اور ہسپتال میں داخلے کے خلاف اس کی افادیت 100 فیصد ہے۔
اسی طرح معتدل سے سنگین بیماری کے ویکسین کی افادیت 75 فیصد ہے۔
سنوفی کمپنی کے سینئر عہدیدار کا کہنا ہے کہ اس ویکسین کو فریج کے درجہ حرارت میں بھی محفوظ کیا جاسکتا ہے، جو کم آمدنی والے ممالک کےلیے انتہائی بہترین ہے۔
