اوکے یا OK ہماری روزمرہ کی بول چال کا سب سے عام لفظ ہے لیکن کیا آپ اس لفظ کا مطلب یا مکمل معنی جانتے ہیں؟
اوکے 2 فیک الفاظ پر مبنی ہے یا کم از کم یہی سمجھا جاتا ہے، 1830 کی دہائی میں لوگ مذاق میں آل کریکٹ (all correct) کو oll korrekt کہتے تھے اور ممکنہ طور پر اسی کا مخفف اوکے ہے۔
سنہ 1839 میں بوسٹن کے ایک اخبار میں بھی اوکے لفظ کو استعمال کیا گیا تھا، اس وقت ایڈیٹر اسے آل کریکٹ کو کہنے کے لیے استعمال کرتے تھے۔
آکسفورڈ ڈکشنری کے مطابق اوکے کے استعمال کا پرانا تحریری حوالہ سنہ 1840 میں امریکی صدارتی انتخابات میں ڈیمو کریٹ امیدوار کی جانب سے استعمال کیا گیا۔
ان انتخابات میں ڈیمو کریٹ پارٹی کی جانب سے مارٹن وان بیورن امیدوار تھے جن کی عرفیت اولڈ کنڈرہک (نیویارک اسٹیٹ میں پیدائش کے مقام سے منسوب) تھی اور ان کے حامیوں نے اوکے کلب کو تشکیل دیا۔
اس کے نتیجے میں اس اصطلاح کو مقبولیت ملی، پھر ٹیلی گراف کی آمد کے بعد مختصر الفاظ کے استعمال نے بھی اسے مقبول کیا۔
اگر اسپیلنگ کی بات کی جائے تو OK اور Okay دونوں ہی ٹھیک ہیں۔
