انقرہ: اسرائیلی صدر 15 برس بعد ترکی کے دورے پر انقرہ پہنچ گئے۔
تفصیلات کے مطابق اسرائیلی صدر آئزک ہرزوگ 2 روزہ سرکاری دورے پر انقرہ پہنچ گئے ہیں، اسرائیلی صدر کی ترک ہم منصب رجب طیب اردوان سے ابتدائی ملاقات بھی ہو گئی۔
دونوں رہنماؤں کی ملاقات میں یوکرین بحران، اور مختلف شعبوں میں باہمی دوطرفہ تعاون پر تبادلہ خیال ہوا، میڈیا رپورٹس کے مطابق اس دورے کا مقصد دونوں ممالک کے درمیان کئی برس سے جاری تناؤ کے بعد تعلقات بہتر بنانا ہے۔
اسرائیلی صدر نے کہا کہ ترکی کے صدارتی کمپلیکس میں پُر تپاک استقبال کے لیے میں صدر اردوان کا شکر گزار ہوں، میں اس بات پر پختہ یقین رکھتا ہوں کہ ہمارے اس خطے میں تمام لوگ، عقائد اور ریاستیں امن کے ساتھ رہ سکتے ہیں اور رہنے چاہیئں، اور ہمارے درمیان یہ شراکت داری ہم سب کے لیے برکات اور خوش حالی لائے گی۔
İsrail Devlet Başkanı Isaac Herzog’u Resmî Karşılama Töreni https://t.co/JxZ84jF70q
— T.C. Cumhurbaşkanlığı (@tcbestepe) March 9, 2022
واضح رہے کہ اسرائیلی صدر آئزک ہرزوگ اپنی اہلیہ مشل کے ساتھ اردوان کی جانب سے دی گئی دعوت پر ترکی پہنچے ہیں، جب سے انھوں نے منصب سنبھالا ہے، تب سے انھوں نے ترکی کے ساتھ بات چیت کا آغاز کیا ہے۔
اسرائیلی صدر کا کہنا ہے کہ ترکی کے ساتھ تعلقات استوار کرنا اور درمیان میں حائل خلیج پاٹنا، اسرائیل اور علاقائی مفاد میں ہے، اس لیے مجھے امید ہے کہ یہ دورہ دونوں ممالک کے درمیان ایک اہم مذاکرات کی طرف لے جائے گا۔
