کراچی : قومی ایئر لائن کے جہازوں کی نیلامی کا معاملے پر اہم پیشرفت ہوئی ہے، نیلامی29 مارچ سال 2022کو ہوگی۔
اس حوالے سے ذرائع کا کہنا ہے کہ پی آئی اے نے فضائی بیڑے میں شامل ناکارہ جہازوں کی نیلامی کے لیے ٹینڈر طلب کرلیے۔
ذرائع کے مطابق پی آئی اے طیاروں کو "جیسا ہے، جہاں ہے” کی بنیاد پر کھلی نیلامی کے ذریعے فروخت کرنے کا ارادہ رکھتی ہے۔
ذرائع کا کہنا ہے کہ نیلامی کے حامل3ایئر بس اے310-300 ساختہ طیارے کراچی ائیر پورٹ پر موجود ہیں، درخواست جمع کرانے کی آخری تاریخ 18 مارچ سال2022 جبکہ نیلامی29 مارچ سال 2022 کو ہوگی۔
پی آئی اے ذرائع نے بتایا ہے کہ جہازوں کی بولی کی تقریب کراچی ائیرپورٹ سے ملحق پی آئی اے ایس ایم سی بلڈنگ میں منعقد ہوگی۔
پی آئی اے انتظامیہ کے مطابق کامیاب بولی دہندہ کو نیلامی کی 25% رقم اسی دن پی آئی اے کو بینک ڈرافٹ کے طور پر جمع کرانا ہوگی، بولی کی باقی ماندہ75% رقم ہفتے کے پانچ کام کے دنوں میں ادا کرنا ہوگی۔
