بالی ووڈ اداکار ریتھک روشن اور اداکارہ و گلوکارہ صبا آزاد کی شادی سے متعلق سوشل میڈیا پر خبریں وائرل ہورہی ہیں۔
بھارتی میڈیا کے مطابق بالی ووڈ اداکار ریتھک روشن اور صبا آزاد کو ممبئی کے ایک ریسٹورنٹ میں دیکھا گیا تھا تب سے ان کی شادی کی خبریں سوشل میڈیا کی زینت بنی ہوئی ہیں۔
حال ہی میں صبا کو ریتھک کی فیملی کے ساتھ بھی وقت گزارتے دیکھا گیا تھا۔
تاہم ریتھک روشن اور صبا نے اپنے رشتے یا شادی سے متعلق کوئی وضاحت نہیں دی لیکن دونوں کے ایک مشترکہ دوست نے سچائی بیان کردی۔
ریتھک کے دوست نے بھارتی میڈیا سے گفتگو کرتے ہوئے کئی انکشافات کیے اور بتایا کہ دونوں ایک دوسرے کو پسند کرتے ہیں اور اداکار کی فیملی بھی صبا کو پسند کرتی ہے۔
انہوں نے بتایا کہ ریتھک کی فیملی کو صبا کی موسیقی پسند ہے گزشتہ دنوں وہ ایک موسیقی کے پروگرام میں ان کے گھر گئی تھیں، ریتھک اور صبا دونوں دوست ہیں لیکن فی الحال شادی میں وہ جلدی نہیں کرنا چاہتے۔
صبا آزاد کا اصل نام صبا سنگھ گریوال ہے اور وہ اداکاری کے ساتھ گلوکاری اور ڈائریکشن کے میدان میں بھی سرگرم ہیں۔
یاد رہے کہ اداکار ریتھک روشن نے پہلی شادی اپنی بچپن کی دوست اور محبت سوزانے خان سے کی تھی اور ان سے دونوں کے 2 بچے بھی ہیں تاہم یہ جوڑا 7 سال قبل اپنی راہیں جدا کرچکا ہے۔
