کراچی: قومی ایئر لائن نے ریونیو میں اضافے کی حکمت عملی کے تحت خصوصی کارگو پروازیں شروع کرنے کا اعلان کردیا ہے۔
اے آر وائی نیوز کے مطابق پی آئی اے نے اسلام آباد سےکاشغر کیلئےخصوصی کارگوچارٹرپروازیں چلانے کا فیصلہ کیا ہے، ترجمان پی آئی اے کے مطابق 31مارچ تک جاری رہنے والی پروازوں کیلئےایئربس طیارے استعمال ہونگے۔
ترجمان پی آئی اے کے مطابق کاشغر کیلئے دس چارٹر پروازیں آپریٹ کی جائیں گی، ان چارٹرپروازوں سےبرآمدکنندگان کو مصنوعات کی ترسیل میں آسانی اور پی آئی اے کو اضافی ریونیو حاصل ہو گا۔
یہ بھی پڑھیں: پی آئی اے کو مزید 2 چینی شہروں کے لیے پروازیں چلانے کا لائسنس مل گیا
اس سے قبل رواں ماہ پی آئی اے کو مزید 2 چینی شہروں کے لیے پروازیں چلانے کا لائسنس ملا تھا، پی آئی اے کے کنٹری منیجر قادر بخش سانگی نے بتایا کہ اس سے قبل پی آئی اے کے پاس صرف بیجنگ کے لیے آپریٹنگ لائسنس تھا، اب چین کی سول ایوی ایشن ایڈمنسٹریشن (سی اے اے سی) نے ایئر لائن کو پاکستان اور چین کے مزید دو شہروں کے درمیان فلائٹ آپریشنز چلانے کے لیے لائسنس دے دئیے۔
پی آئی اے کو چینی حکام کی جانب سے کنمنگ اور شینزن کے لیے چارٹرڈ کارگو پروازیں چلانے کی منظوری بھی حاصل ہے، جب کہ کاشغر (سنکیانگ) کے لیے منظوری کا عمل جاری ہے۔
