رمضان المبارک میں پکوڑے افطار کا لازمی جز ہیں، تاہم کچھ لوگ پکوڑے کھانے سے اس لیے گھبراتے ہیں کہ ان میں تیل بہت ہوتا ہے اور اس کو کھا کر وزن بہت بڑھ جاتا ہے۔

اس سے بچنے کے لیے آج آپ کو ایک آسان ٹپ بتائی جارہی ہے، اگر پکوڑے تلتے وقت گرم تیل میں ایک چٹکی نمک ڈال دیں تو اس سے پکوڑوں میں تیل جذب نہیں ہوگا۔

اس کے علاوہ بیسن گھولتے وقت اس میں ایک چائے کا چمچ تیل ملا لیں ،اس سے بھی پکوڑوں میں تیل جذب نہیں ہوتا۔

چاول کے پکوڑے

چاول کے مزیدار پکوڑے بنانے کی ترکیب مندرجہ ذیل ہے۔

اجزا

بیسن: تین چوتھائی کپ

ادرک باریک کٹی ہوئی: 1 کھانے کا چمچ

چاول ابلے ہوئے: 2 کپ

چاٹ مصالحہ: 1 چائے کا چمچ

ہری مرچ باریک کٹی ہوئی: 1 کھانے کا چمچ

نمک: حسب ذائقہ

پیاز باریک کٹی ہوئی: 2 عدد

ہرا دھنیا باریک چوپ کیا ہوا: 1 کھانے کا چمچ

تیل تلنے کے لیے: حسب ضرورت

ترکیب

ایک پیالے میں بیسن، ادرک، چاول، چاٹ مصالحہ، ہری مرچ، نمک، پیاز اور ہرا دھنیا ڈال کر خوب اچھی طرح مکس کر لیں اور پانی ڈال کر گاڑھا پیسٹ بنا لیں۔

اب کڑاہی میں تیل گرم کریں اور آنچ درمیانی رکھیں، جب تیل گرم ہو جائے تو ہاتھوں سے یا کسی چمچے کی مدد سے اس آمیزے کو ڈالتے جائیں اور ڈیپ فرائی کر لیں، یہاں تک کہ رنگ سنہرا ہو جائے۔

مزیدار چاولوں کے پکوڑے تیار ہیں، ٹشو پیپر پر رکھ کر چٹنی کے ساتھ گرم گرم سرو کریں۔