ڈپٹی اسپیکر قاسم سوری کیخلاف تحریک عدم اعتماد پر رائے شماری 16 اپریل کو اسپیکر قومی اسمبلی کےانتخاب کے بعد کرائی جائیگی
اے آر وائی نیوز کے مطابق ڈپٹی اسپیکر قومی اسمبلی قاسم سوری کیخلاف تحریک عدم اعتماد پر رائے شماری 16 اپریل کو کرائی جائیگی۔
16 اپریل کو ہی قومی اسمبلی کے نئے اسپیکر کا انتخاب شیڈول ہے، ڈپٹی اسپیکر کیخلاف عدم اعتماد پر ووٹنگ اسپیکر کا انتخاب ہونےکے بعد کرائی جائیگی۔
واضح رہے کہ ڈپٹی اسپیکر قاسم سوری کے خلاف 8 اپریل کو سیکریٹری قومی اسمبلی کے پاس تحریک عدم اعتماد جمع کرائی گئی تھی۔
یہ تحریک عدم اعتماد پاکستان مسلم لیگ (ن) کے رہنما مرتضی جاوید عباسی نے جمع کرائی تھی۔
سیکریٹری قومی اسمبلی کے پاس جمع کرائی گئی تحریک عدم اعتماد میں کہا گیا ہے کہ ڈپٹی اسپیکر قاسم سوری نے غیر آئینی رولنگ دی، سپریم کورٹ ڈپٹی اسپیکر کی رولنگ کو آئین سے متصادم قرار دے چکی ہے، سپریم کورٹ نے قرار دیا کہ رولنگ غیر آئینی تھی، قاسم خان سوری نے اپنے عہدے کی پاسداری نہیں کی۔
مزید پڑھیں: ڈپٹی اسپیکر کیخلاف تحریک عدم اعتماد جمع
تحریک عدم اعتماد کے متن میں مزید کہا گیا ہے کہ قاسم سوری نے ایوان چلاتے ہوئے بدترین طریقہ اختیار کیا،انہوں نے آئینی شقوں کی پامالی کی، ایوان چلاتے ہوئے بدترین مثال قائم کی۔
