برطانیہ کی مسلمان رکن پارلیمنٹ ناز شاہ نے وزیراعظم بورس جانسن سے مطالبہ کیا ہے کہ وہ بھارت میں بڑھتے اسلامو فوبیا کیسز پر بھی آواز اٹھائیں۔
وزیراعظم بورس جانسن ان دنوں بھارت کے دورے پر ہیں اس موقع پر برطانیہ کی مسلمان رکن پارلیمنٹ ناز شاہ نے اہم مطالبہ کردیا ہے اور کہا ہے کہ بورس جانسن دورہ بھارت کے دوران مودی حکومت کے سامنے بھارت میں بڑھتے اسلامو فوبیا کے کیسز پر بھی آواز اٹھائیں۔
یاد رہے کہ گزشتہ روز برطانوی وزیراعظم بورس جانسن بھارت کے 2 روزہ دورے پر بھارتی ریاست گجرات کے شہر احمدآباد پہنچے تھے۔ برطانوی وزیراعظم آج نئی دلی میں بھارتی وزیراعظم مودی سے ملاقات کریں گے۔
واضح رہے کہ بھارت میں انتہا پسند بی جے پی کی حکومت میں آئے روز مسلم دشمن اقدامات سامنے آتے رہتے ہیں۔
رواں سال پہلے حجاب پر پابندی کا معاملے نے سر اٹھایا اس کے بعد زبردستی گوشت کی دکانیں بند کرانے، مسلم دکانداروں کا بائیکاٹ اور دیگر اقدامات آئے دن انتہا پسند حکومت کی پول کھولتے رہتے ہیں۔
بھارت کے اسی اسلامو فوبیا کیخلاف کویت بھی آواز اٹھا چکا ہے اور اس نے او آئی سی سے مطالبہ کیا تھا کہ وہ بھارت میں بڑھتے اسلامو فوبیا کا نوٹس لے۔
مزید پڑھیں: کویت کا او آئی سی سے بھارت میں اسلامو فوبیا کا نوٹس لینے کا مطالبہ
کویت کونسل آف منسٹرز نے کہا تھا کہ او آئی سی ہنگامی اقدامات کرے اور بھارت میں مسلمانوں کےحقوق کےتحفظ کیلئے آواز اٹھائے۔
