ماضی کی معروف پاپ سنگر بھائی بہن کی جوڑی نازیہ حسن اور زوہیب حسن صرف پاکستان میں ہی نہیں بلکہ دنیا بھر میں مشہور تھی، کروڑوں دلوں کی ملکہ نازیہ حسن انتہائی کم عمری میں ہی کینسر کا شکار ہو کر دنیا سے چلی گئیں۔
نازیہ کی موت کے بعد زوہیب حسن سے نہ صرف ان کی پیار کرنے والی بہن چھن گئی بلکہ ان کی بچپن کی دوست اور ساتھی گلوکارہ بھی ہمیشہ کے لیے جدا ہوگئی۔
زوہیب اپنی بہن سے آج بھی اتنی محبت کرتے ہیں کہ اکثر ٹی وی شوز میں انہیں یاد کرتے ہوئے آبدیدہ ہوجاتے ہیں۔ زوہیب حسن اور ان کے اہل خانہ کے پاس نازیہ کی سب سے بہترین نشانی ان کا بیٹا موجود ہے جسے زوہیب اپنے بیٹوں کی طرح چاہتے ہیں۔
حال ہی میں زوہیب حسن نے اپنی مرحومہ بہن اور بھانجے کی ایک ایسی تصویر اپنے انسٹاگرام پر شئیر کی ہے جسے نازیہ کے مداحوں نے شاید ہی کبھی دیکھا ہو۔
زوہیب حسن نے اس تصویر کے ساتھ لکھا کہ یہ نازیہ حسن اور ان کے نومولود بیٹے آریز کی ایک بہت نایاب تصویر ہے۔ جب نازیہ کو اپنے اندر کینسر کی بیماری کا علم ہوا تو انہوں نے ڈاکٹر سے کہا کہ پلیز میری جان بچانے کی اور کوشش کریں تاکہ میں اپنے بیٹے کو بڑا ہوتا ہوا دیکھ سکوں۔
زوہیب حسن نے اپنے بھانجے کے حوالے سے اپنے مداحوں کو آگاہ کرتے ہوئے مزید لکھاکہ بدقسمتی سے نازیہ کو لمبی عمر تو نہ مل سکی مگر ان کے بیٹے کی پرورش میری اور نازیہ کی والدہ، ہماری بہن زہرہ اور میں نے مل کر کی ہے۔
نازیہ کا خواب تھا کہ ان کا اکلوتا بیٹا آریز ایک کامیاب وکیل بنے تو اب ان کا خواب پورا ہوگیا ہے اور آریز اب دنیا کی ایک بڑی لا فرم کے لیے کام کررہا ہے۔
View this post on Instagram
سوشل میڈیا صارفین نازیہ حسن کے بیٹے کی کامیابی پر بہت خوش ہیں اور نازیہ کی مغفرت کے ساتھ ساتھ ان کے بیٹے کی مزید کامیابی لیے بھی دعاگو ہیں۔
