نومنتخب وزیراعلیٰ پنجاب حمزہ شہباز نے کہا ہے کہ آئین سب سے بڑا اور انا چھوٹی ہے، صدر اور گورنر کو ہوش کے ناخن لینا ہونگے۔
نومنتخب وزیراعلیٰ پنجاب حمزہ شہباز نے لاہور میں میڈیا سے گفتگو کرتے ہوئے کہا کہ تین ہفتے ہونے کو ہیں ملک کے سب سے بڑے صوبے کا کوئی وزیر اعلیٰ نہیں، گورنر اور صدر تاریخ کو داغدار نہ کریں، وہ عمران نیازی کے ذاتی غلام نہ بنیں اور آئین کے تحت کام کریں۔
حمزہ شہباز نے مزید کہا کہ کل ساری قوم نےسن لیا کہ عدالت میں کیا دلائل ہوئے، مجھے عدالت عالیہ سے اچھے کی امید ہے، پنجاب اسمبلی کا اجلاس کل ہو گا تو دیکھیں گے کیا ہوتا ہے، ان کو سمجھ آجانی چاہیے کہ ڈنڈے اور گنڈاسے کی سیاست نہیں چلتی۔
نومنتخب وزیراعلیٰ پنجاب کا کہنا تھا کہ میرا حلف نہ لینے کا ایک ہی آدمی ذمےدار ہے، جس نےآئین توڑا، وہ تربیت دےرہا ہے اداروں پرچڑھ دوڑو، عمران نیازی مجرم ہے جس نے لاکھوں لوگوں کو بے روزگار کیا ہے لیکن ہم عمران خان کی گیدڑ بھبھکیوں میں آنے والے نہیں ہیں۔
انہوں نے مزید کہا کہ عمران خان نے توشہ خانہ میں ہیراپھیری کی، سابق وزیراعظم فارن فنڈنگ کیس میں اداروں کودھمکا رہے ہیں لیکن ہم اداروں کے ساتھ کھڑے ہوں گے اور عمران خان کو ہیراپھیری کا عوامی عدالت میں جواب دینا ہوگا۔
واضح رہے کہ عدالت نے نومنتخب وزیراعلیٰ پنجاب کی حلف برداری کیس کا فیصلہ سنا دیا ہے۔
مزید پڑھیں: عدالت نے حمزہ شہباز حلف برداری کیس کا فیصلہ سنا دیا
لاہور ہائیکورٹ نے محفوظ فیصلہ سناتے ہوئے کہا ہے کہ گورنر پنجاب کل تک خود یا کسی اور نمائندے کےذریعے حلف لیں، گورنر پنجاب کل تک حلف برداری لازمی کرائیں۔
