کراچی: سوشل میڈیا پر جامعہ کراچی میں وین پر بلوچ خاتون کے خود کش حملے کے حامی افراد کے خلاف کریک ڈاؤن کا فیصلہ کیا گیا ہے۔
تفصیلات کے مطابق سیکیورٹی اداروں نے سوشل میڈیا پر جامعہ کراچی حملے کے حامی افراد کے خلاف کریک ڈاؤن کا فیصلہ کیا ہے، اس خود کش حملے میں حملہ آور خاتون اور چینی اساتذہ سمیت 5 افراد ہلاک ہو گئے تھے۔
سیکیورٹی اداروں نے حملے کے حامی سوشل میڈیا اکاؤنٹس کی تفصیل جمع کرنے کا آغاز کر دیا ہے، ذرائع نے انکشاف کیا ہے کہ بیش تر اکاؤنٹس بیرون ملک سے آپریٹ کیے جا رہے ہیں۔
جامعہ کراچی خودکش حملہ : خودکش بمبار شاری بلوچ کے اصل گھر کا سراغ لگا لیا گیا
ادھر جامعہ کراچی خودکش حملے کی تحقیقات میں مزید پیش رفت ہوئی ہے، تفتیشی ذرائع نے کہا ہے کہ پولیس نے خود کش حملہ آور خاتون کا ایک اور گھر تلاش کر لیا ہے، دہلی کالونی میں بھی خاتون کے شوہر نے ایک گھر کرائے پر لیا تھا جسے حملے سے قبل خالی کیا گیا۔
کراچی یونیورسٹی حملے میں جاں بحق وین ڈرائیور کی لاش کی شناخت ہوگئی
ذرائع نے بتایا کہ خود کش حملہ آور خاتون کا شوہر ابتدائی شواہد سے حملے کا اہم کردار لگتا ہے، گلستان جوہر اور دہلی کالونی میں کرائے پر گھر لیےگئے، اسکیم 33 میں واقع والد کا گھر بھی حملے سے کچھ عرصے قبل ہی خالی کیا گیا۔
