بارسلونا: پاکستان کی ہاکی ٹیم نے دیار غیر میں عیدالفطر منائی، پرمسرت موقع پر کھلاڑیوں نے ایک دوسرے کو مبارکباد دی ۔
تفصیلات کے مطابق پاکستان ہاکی ٹیم اس وقت دورہ یورپ کے لئے اسپین میں موجود ہے، جہاں انہوں نے بارسلونا کی مقامی مسجد میں نماز عیدالفطر ادا کی، نماز کی ادائیگی کے بعد ٹیم آفیشلز، کھلایوں اور مقامی کمیونٹی نے ایک دوسرے کو عید کی مبارکباد پیش کی، اس موقع پر کھلاڑی مقامی کمیونٹی میں گھل مل گئے۔
قومی ہاکی ٹیم دورہ یورپ کےآخری مرحلے میں اسپینش ٹیم کیساتھ دو میچوں کی سیریز کھیلنے پہنچی ہے، جہاں وہ تین اور چار مئی کو اسپینش ٹیم کے خلاف میدان میں اترے گی، اسی کے ساتھ پاکستان ہاکی ٹیم کا دورہ یورپ اختتام پزیر ہوجائے گا اور پانچ مئی کو ٹیم وطن واپسی کے لئے روانہ ہوگی۔
یہ بھی پڑھیں: دورہ یورپ: قومی ہاکی ٹیم کو دوسرے میچ میں ہالینڈ سے شکست
واضح رہے کہ دورہ یورپ کے لئے بیس رکنی پاکستان ہاکی ٹیم کی قیادت عمر بھٹہ کررہے ہیں جبکہ علی شان نائب کپتان ہیں، یدگر کھلاڑیوں میں اکمل، عبداللہ اشتیاق، مبشر علی، عماد شکیل، محمد عبد اللہ، ارباز علی، محمد رضوان، حماد انجم، غضنفر اور معین شکیل شامل ہیں۔
اسی طرح عبدالمنان، جنید منظور، رومان خان، ابو بکر محمود، رانا وحید، سلمان رزاق، حنان شاہد اور اعجاز بھی 20 رکنی پاکستان ہاکی ٹیم کا حصہ ہیں، ٹیم منیجمنٹ میں منیجر خواجہ جنید، سیگفریڈ ایکمین، وسیم احمد، باب جان ویلڈف اور ندیم لودھی شامل ہیں۔
