پشاور: صوبہ خیبر پختونخواہ میں اتوار کے روز درجہ حرارت میں 7 سے 9 ڈگری سینٹی گریڈ اضافے کا امکان ہے، صوبائی حکومت نے تمام متعلقہ اداروں کو الرٹ رہنے کی ہدایات کی ہیں۔
تفصیلات کے مطابق صوبہ خیبر پختونخواہ میں 8 مئی اتوار کے روز درجہ حرارت میں غیر معمولی اضافہ متوقع ہے، جنوبی علاقوں میں درجہ حرارت میں 7 سے 9 ڈگری سینٹی گریڈ اضافے کا امکان ہے۔
صوبائی حکومت نے تمام متعلقہ اداروں کو الرٹ رہنے کی ہدایات کی ہیں، عوام کو بھی ہیٹ اسٹروک سے پچنے کے لیے الرٹ رہنے کا کہا گیا ہے۔
خیال رہے کہ محکمہ موسمیات نے آئندہ ہفتے ملک بھر میں ہیٹ ویو کی پیشگوئی کرتے ہوئے کہا ہے کہ بالائی پنجاب، اسلام آباد، خیبر پختونخواہ، گلگت بلتستان اور کشمیر میں پارہ معمول سے 9 ڈگری زیادہ رہنے کی توقع ہے۔
محکمہ موسمیات کا کہنا ہے کہ بالائی اور وسطی سندھ، وسطی اور جنوبی پنجاب اور بلوچستان میں درجہ حرارت معمول سے 8 ڈگری زیادہ رہنے کا امکان ہے۔
حکام نے شدید گرم اور خشک موسم کے باعث آبی ذخائر، فصلوں، سبزیوں اور باغات کو پانی کی کمی کا خدشہ بھی ظاہر کیا ہے۔
