کراچی ایئر پورٹ پر جعلی کاغذات پر بیرون ملک جانے والے04 مسافروں کو گرفتار کرلیا گیا ہے، مذکورہ مسافر کراچی سے کینیڈا اور ترکی جانے کی کوشش کررہے تھے۔

اس حوالے سے ذرائع کا کہنا ہے کہ ایف آئی اے امیگریشن کے عملے نے جناح انٹرنیشنل ائیرپورٹ پر کامیاب کارروائی کی ہے۔

اس کارروائی کے دوران جعلی دستاویزات پر کراچی سے کینیڈا اور ترکی جانے کی کوشش کرنے والی خاتون سمیت چار مسافروں کو گرفتار کرلیا گیا۔

ایف آئی اے ذرائع کے مطابق عدنان خان نامی مسافر ترکی کے جعلی ویزے پر استنبول جانا چاہ رہا تھا، امیگریشن افسر نے مسافر کے سفری دستاویزات اور ویزے کو چیک کیا تو وہ جعلی نکلا۔

دوسری کارروائی میں ایف آئی اے نے کراچی سے کینیڈا جانے والے تین مسافروں کو جعلی ویزے پر گرفتار کیا کینڈا جانے والے خاندان کے ویزے چیک کئے گئے تو وہ جعلی نکلے۔

اسسٹنٹ ڈائریکٹر ایف آئی اے آصف بلوچ کے مطابق مذکورہ مسافروں کو آف لوڈ کرکے گرفتار کرلیا گیا ہے، چاروں مسافروں کو ایف آئی اے پاسپورٹ سیل منتقل کردیا گیا ہے۔