سابق چیف جسٹس آف پاکستان آصف سعید کھوسہ نے سوشل میڈیا اکاؤنٹس کے حوالے سے وضاحت کرتے ہوئے کہا ہے کہ انکا فیس بک یا ٹوئٹر پر کوئی اکاؤنٹ نہیں۔
اے آر وائی نیوز کے مطابق سپریم کورٹ کے سابق چیف جسٹس آصف سعید کھوسہ نے سوشل میڈیا پر اپنے اکاؤنٹس کے حوالے سے وضاحت کردی ہے۔
سابق چیف جسٹس آف پاکستان کے ترجمان کے مطابق آصف سعید کھوسہ کا فیس بک یا ٹوئٹر پر کوئی اکاؤنٹ نہیں ہے اور ٹوئٹر سمیت کسی بھی سوشل میڈیا ویب سائٹ پر ان کی جانب سے کوئی پوسٹ نہیں کی گئی ہے۔
ترجمان کا مزید کہنا تھا کہ سوشل میڈیا کی ویب سائٹس پر سابق چیف جسٹس آصف سعید کھوسہ کے نام سے چلنے والی تمام پوسٹ جعلی اور من گھڑت ہیں۔
واضح رہے کہ اس سے قبل سپریم کورٹ کے ایک اور سابق چیف جسٹس ثاقب نثار نے بھی سوشل میڈیا پر اپنے اکاؤنٹس کے حوالے سے تردید کی تھی۔
سابق نثار نے اپنے بیان میں کہا تھا کہ میرا کوئی ٹوئٹر یا فیس بک اکاؤنٹ نہیں ہے، جعلی اکاؤنٹ بنا کر میرے نام سے پوسٹس کی جا رہی ہیں۔
مزید پڑھیں: ثاقب نثار نے سوشل میڈیا اکاؤنٹس رکھنے کی تردید کردی
اس حوالے سے ان کا مزید کہنا تھا کہ جعلی اکاؤنٹ کے حوالے سے ٹوئٹر کو شکایت بھجوا دی ہے، جعلی اکاؤنٹ بنانے والوں کے خلاف قانون کارروائی کریں گے۔
