سابق وفاقی وزیر اور پی ٹی آئی سندھ کے صدر علی زیدی نے وزیر داخلہ رانا ثنااللہ کے بیان پر کہا ہے کہ ان دھمکیوں کو سیریس نہیں لیتا، روک سکو تو روک لو۔
اے آر وائی نیوز کے مطابق پی ٹی آئی سندھ کے صدر اور سابق وفاقی وزیر علی زیدی نے وزیر داخلہ رانا ثنا اللہ کے بیان پر شدید ردعمل کا اظہار کرتے ہوئے کہا ہے کہ یہ حکومت میں بیرونی سازش کے ذریعے آئے، ایسی حکومت کی دھمکیاں کیا ہوں گی، ان کی دھمکیوں کو سیریس نہیں لیتا روک سکو تو روک لو۔
علی زیدی نے اپنے بیان میں کہا کہ رانا ثنا اس کرائم منسٹر کا وزیر ہے جس کا بھائی باہر بھاگا ہوا ہے تین بار وزیراعظم رہنے والا لندن میں ہے اور مسجد میں عید کی نماز پڑھنے نہیں جاسکتا، عید کی نماز پڑھنے کیلیے انہیں مولانا کو گھر بلانا پڑتا ہے۔
پی ٹی آئی رہنما نے کہا کہ دھمکیاں دینے والوں کو چیلنج کرتا ہوں کہ کسی مسجد میں جاکر نماز جمعہ پڑھ کر دکھا دیں، انہوں نے جو تباہی کی ہے عوام کو اس پر سخت غصہ ہے۔
واضح رہے کہ وفاقی وزیر داخلہ رانا ثنا اللہ نے پی ٹی آئی کے اسلام آباد مارچ کے حوالے سے کہا تھا کہ میں چاہوں کو عمران خان 20 افراد بھی اسلام آباد نہیں لاسکے گا تاہم لانگ مارچ کو کیسے ہینڈل کرنا ہے وفاقی کابینہ فیصلہ کرے گی۔
مزید پڑھیں: میں چاہوں تو عمران خان 20 افراد بھی اسلام آباد نہیں لاسکے گا ، رانا ثنااللہ کی دھمکی
وزیر داخلہ نے کہا تھا کہ لانگ مارچ کو کیسے ہینڈل کرنا ہے یہ وفاقی کابینہ فیصلہ کرےگی ، وفاق نے فیصلہ کیا کہ لانگ مارچ روکنا ہےتویہ 20 لوگ بھی نہیں لاسکتے۔
