کراچی: شہر قائد میں آج بھی موسم صبح سے خوش گوار ہے، تاہم محکمہ موسمیات کا کہنا ہے کہ شہر میں دن میں گرد آلود ہوائیں چلنے کا امکان ہے۔
محکمہ موسمیات کے مطابق آج اتوار کے روز کراچی شہر کا مطلع ابر آلود ہے، دن بھر بھی مطلع جزوی ابر آلود رہے گا، اور دن میں گرمی کی شدت بھی کم ہوگی۔
محکمہ موسمیات نے خبردار کیا ہے کہ شہر میں دن میں گرد آلود ہوائیں چلنے کا بھی امکان ہے، شہر کا موجودہ درجہ حرارت 30 ڈگری سینٹی گریڈ ہے، اور ہوا 25 کلو میٹر فی گھنٹے کی رفتار سے ہوا چل رہی ہے، جب کہ ہوا میں نمی کا تناسب 70 فی صد ہے۔
موسمیات کے مطابق دن میں درجہ حرارت 34 سے 36 ڈگری سینٹی گریڈ تک رہے گا، اور دن میں ہوا 40 کلو میٹر فی گھنٹے کی رفتار سے چلے گی۔
واضح رہے کہ کراچی میں گزشتہ روز سے موسم خوش گوار ہو گیا ہے، اور شدید گرمی کا زور بھی ٹوٹ چکا ہے، جس پر شہریوں نے سکون کا سانس لیا۔
