لاہور : محکمہ صحت پنجاب نے حقیقی آزادی مارچ کے پیش نظرصوبے کے اسپتالوں میں ایمرجنسی نافذ کردی اور ڈاکٹرز ، نرسز اور پیرامیڈیکل اسٹاف کی چھٹیاں بند کردیں۔
تفصیلات کے مطابق حقیقی آزادی مارچ کے پیش نظر پنجاب کے اسپتالوں میں ایمرجنسی لگا دی گئی اور اسپتالوں میں ڈاکٹرز اور عملے کو سرگرم رہنے کی ہدایات جاری کردیں۔
ڈاکٹرز ، نرسز اور پیرامیڈیکل اسٹاف کی آئندہ 3 روز تک چھٹیاں بند کرتے ہوئے اسپتالوں میں جان بجانے والی ادویات اور سامان کی موجودگی کو یقینی بنانے کی ہدایت کردی ہے۔
ذرائع محکمہ صحت پنجاب کا کہنا ہے کہ کسی بھی ایمرجنسی صورتحال سے نمٹنے کے لئے ڈاکٹرز کو گھروں سے بھی بلایا جا سکتا ہے۔
یاد رہے پاکستان تحریک انصاف کے چیئرمین عمران خان نے 25 مئی کو اسلام آباد کی طرف لانگ مارچ کا اعلان کیا تھا۔
عمران خان کا کہنا تھا کہ25 تاریخ کو اسلام آباد میں دوپہر تین بجے سرینگر ہائی وے پر ملوں گا، ہمارا ایک ہی مطالبہ ہے الیکشن کی تاریخ دو اور اسمبلی تحلیل کرو، ہم چاہتے ہیں ملک میں صاف و شفاف الیکشن ہو۔
