کراچی: ملکی زرمبادلہ ذخائر میں مزید 59 کروڑ 49 لاکھ ڈالر کی کمی ریکارڈ کی گئی ہے۔
اسٹیٹ بینک آف پاکستان کے مطابق ملکی زرمبادلہ ذخائر میں کمی کا سلسلہ رواں ہفتہ بھی جاری رہا اور ذخائر مزید کم ہو کر 15 ارب 17 کروڑ ڈالر پر آگئے ہیں، ملکی زرمبادلہ کے ذخائر 3 جون کو ختم ہونے والے ہفتے میں 59 کروڑ 49 لاکھ ڈالر کم ہوئے ہیں۔
اسٹیٹ بینک کا کہنا ہے کہ کمرشل بینکوں کے ذخائر 3 جون 22 تک 9.82 کروڑ ڈالر کم ہوکر 5.95 ارب ڈالر ہوگئے ہیں جبکہ اسٹیٹ بینک کے ذخائر 49.67 کروڑ ڈالر کم ہوکر 9.22 ارب ڈالر رہے۔
ماہرین کا کہنا ہے کہ اگر رواں ماہ آئی ایم ایف سے پاکستان کو نو سو ملین ڈالر نہ ملے تو ذخائر میں مزید کمی متوقع ہے، جس کے باعث ملک مزید معاشی بحران کا شکار ہو سکتا ہے۔
یہ بھی پڑھیں:خطرے کی گھنٹی ، زرمبادلہ کے ذخائر پہلی بار سنگل ڈیجٹ پر آگئے
خیال رہے کہ گزشتہ ہفتہ اسٹیٹ بینک کا کہنا تھا کہ زرمبادلہ ذخائر کم ہو کر 9 ارب 72 کروڑ انتیس لاکھ ڈالر رہ گئے ہیں جبکہ کمرشل بینکوں کے ذخائر 6 ارب چار کروڑ اسی لاکھ ڈالر پر ہیں۔ اسٹیٹ بینک کا کہنا تھا کہ ذخائر میں 366 ملین ڈالر کی کمی بیرونی ادائیگیوں کے باعث ہوئی ہے۔
