لاہور : پنجاب میں پیپلزپارٹی اور مسلم لیگ ن کے درمیان معاملات طے پاگئے ، وزارت خزانہ مسلم لیگ ن اپنے پاس رکھے گی۔
تفصیلات کے مطابق پیپلزپارٹی اور مسلم لیگ ن میں پنجاب کی کابینہ پر معاملات طے پاگئے ، مسلم لیگ ن وزارت خزانہ اپنے پاس رکھے گی جبکہ پیپلز پارٹی کے مزید وزرا کابینہ میں شامل ہوں گے۔
پنجاب میں حسن مرتضی سینئر وزیر ہوں گے ، سینئر وزیر کو سیکرٹریٹ اسٹیٹ گیسٹ ہاؤس میں بنایاجائےگا، حسن مرتضیٰ کواپر مال رہائش گاہ الاٹ ہوگئی ہے تاہم پیپلزپارٹی کو وزارتیں کون سی ملیں گی ابھی تک فیصلہ نہیں ہوسکا۔
حسن مرتضیٰ نے اےآر وائی نیوز سے گفتگو کرتے ہوئے کہا ہے کہ مسلم لیگ ن ہی کووزارت خزانہ رکھنی چاہیے، ہمارے پاس وزارت خزانہ تھی ہی نہیں تو دستبرداری کا سوال ہی پیدا نہیں ہوتا۔
سینئروزیرپنجاب کا کہنا تھا کہ صوبےمیں پانی، روٹی، بجلی جیسی بنیادی سہولتیں ہی نہیں ہیں، عوام کو سہولیات مہیا کریں گے،ہم حکومت کرنے نہیں عوام کی خدمت کرنے آئے ہیں، اپنی جدوجہد سے کم وسائل کے باوجود عوام کو بنیادی سہولتیں بھی دیں گے۔
انھوں نے بتایا کہ ٰپنجاب میں ہمیں کون سی وزارتیں ملیں گی کچھ نہیں کہہ سکتے ،ہمارے مزیدوزراپنجاب کابینہ میں شامل کیے جائیں گے ،13جون کو پنجاب کابینہ اجلاس میں شریک ہوں گے۔
