لاہور : ایم فل اور پی ایچ ڈی کے طلبا کو تحقیق کی مد میں ملنے والی رقم کو دگنا کر دیا گیا جبکہ ریسرچ پیپر شائع کرنے پر ایک سال کی فیس کے برابر اعزازیہ بھی ملے گا۔
تفصیلات کے مطابق یونیورسٹی آف ہیلتھ سائنسز کے طلبا کی ریسرچ گرانٹ میں 100فیصد اضافے کا فیصلہ کرلیا گیا ، فیصلہ پروفیسر جاوید اکرم کی زیر صدارت ایم فل پی ایچ ڈی کمیٹی اجلاس میں کیا گیا۔
ایم فل، پی ایچ ڈی طلبہ کو تحقیق کی مد میں ملنے والی رقم کو دگنا کر دیا ہے، جس کے تحت ایم فل کے لیے ریسرچ گرانٹ سوا لاکھ سے بڑھا کر ڈھائی لاکھ اور پی ایچ ڈی کے لیے ریسرچ گرانٹ پونے 4لاکھ سےبڑھاکر ساڑھے 7لاکھ روپے کردی گئی۔
اس کے علاوہ طلبہ کو ریسرچ پیپر شائع کرنے پر ایک سال کی فیس کے برابر اعزازیہ بھی ملے گا۔
