کراچی : رکن قومی اسمبلی عامرلیاقت کی سابقہ اہلیہ بشریٰ اقبال نے پوسٹ مارٹم کرانے کے فیصلے کے خلاف اپیل دائر کرنے کا اعلان کردیا۔
تفصیلات کے مطابق رکن قومی اسمبلی عامر لیاقت کے پوسٹ مارٹم کیلیے میڈیکل بورڈ کی تشکیل کے بعد ان کی سابقہ اہلیہ بشریٰ عدالت پہنچ گئیں۔
ذرائع کا کہنا ہے کہ سابقہ اہلیہ نے عدالتی فیصلے کی سرٹیفائیڈ کاپی حاصل کرلی ہے، جس کے بعد عامرلیاقت کا پوسٹ مارٹم کرانے کے فیصلے کے خلاف اپیل دائر کی جائے گی۔
اس سے قبل عدالت کے حکم پر ردعمل ظاہر کرتے ہوئے لیاقت کی سابقہ اہلیہ نے ناراضگی کا اظہار کیا اور کہا تھا کہ یہ عمل اسلامی شریعت کے احکام کے خلاف ہے۔
دوسری جانب رکن قومی اسمبلی ڈاکٹر عامر لیاقت کی موت کی وجہ جاننے کے لیے 6 رکنی میڈیکل بورڈ تشکیل دے دیا گیا ہے ،عدالتی احکامات پر 23 جون بروز جمعرات عامر لیاقت حسین کی قبر کشائی کی جائے گی، قبر کشائی صبح ساڑھے9بجے عبداللہ شاہ غازی کے مزار پرہوگی۔
یاد رہے عدالت نے عامر لیاقت کے پوسٹ مارٹم کے لئے قبرکشائی کا حکم دیا تھا، درخواست گزار عبدالاحد نے کہا تھا کہ عامر لیاقت کی اچانک پراسرار موت ہوئی ہے، وہ معروف شخصیت ہیں، وجہ موت کا تعین ضروری ہے، شبہ ہے عامر لیاقت کو جائیداد کے تنازعے ہر قتل کیا گیا ہے۔
واضح رہے کہ عامر لیاقت حسین 9 جون کو اچانک انتقال کر گئے تھے ، وہ اپنے گھر میں مردہ پائے گئے تھے،جس کے بعد انہیں اسپتال منتقل کیا گیا ، جہاں ڈاکٹروں کی ان کی موت کی تصدیق کی تھی تاہم عامر لیاقت کے اہلخانہ نے پوسٹ مارٹم سے انکار کردیا تھا۔
