"ہمارا عقیدہ”

دنیا میں یہ بحث ہمیشہ سے چلی آرہی ہے کہ انڈہ پہلے آیا یا مرغی۔

کچھ لوگ کہتے ہیں انڈہ۔ کچھ کا کہنا ہے مرغی۔ ایک کو ہم مرغی اسکول یا فرقۂ مرغیہ کہہ سکتے ہیں۔ دوسرے کو انڈہ اسکول۔ ہمیں انڈہ اسکول سے منسلک سمجھنا چاہیے۔ ملّتِ بیضا کا ایک فرد جاننا چاہیے۔ ہمارا عقیدہ اس بات میں ہے کہ اگر آدمی تھانے دار یا مولوی یعنی فقیہِ شہر ہو تو اس کے لیے مرغی پہلے اور ایسا غریبِ شہر ہو تو اس کے لیے انڈہ پہلے اور غریبِ شہر سے بھی گیا گزرا ہو تو نہ اس کی دسترس مرغی تک ہوسکتی ہے نہ انڈہ اس کی گرفت میں آسکتا ہے۔ اسے اپنی ذات اور اس کی بقا کو ان چیزوں سے پہلے جاننا چاہیے۔

(ابنِ انشا کی شگفتہ تحریر سے انتخاب)

Comments