میسوری: امریکی ریاست میسوری میں لاس اینجلس سے شکاگو جانے والی ٹرین کے ساتھ بڑا حادثہ پیش آ گیا، جس میں 3 افراد جانوں سے ہاتھ دھو بیٹھے۔
تفصیلات کے مطابق امریکا میں ٹرین حادثے کے نتیجے میں 3 افراد ہلاک اور 50 سے زائد زخمی ہو گئے، لاس اینجلس سے شکاگو جانے والی ٹرین میسوری میں ٹرک سے ٹکرا گئی تھی۔
حادثہ شمالی میسوری میں ریلوے کراسنگ کے دوران رونما ہوا جسے کنٹرول نہیں کیا جا رہا تھا، جہاں کوئی لائٹس یا سگنلز موجود نہیں تھے، پٹری پر ڈمپر ٹرک سامنے آنے سے ریل اس سے ٹکرا کر پٹری سے اتر گئی۔
ہلاک افراد میں دو ٹرین میں سوار تھے، جب کہ ایک ٹرک میں تھا، حادثے کے وقت ٹرین میں 248 مسافر اور عملے کے 12 ارکان سوار تھے۔
نیوز رپورٹس کے مطابق ٹکرانے کے بعد ٹرین کے 8 ڈبے اور 2 انجن پٹری سے اتر گئے، مسافروں نے جان بچانے کے لیے کھڑکیوں اور دروازوں سے چھلانگیں لگا دیں، بہت سے مسافر کھڑکیوں کے ذریعے ٹرین کے اوپر جا کر بیٹھ گئے تھے جنھیں امدادی کارکنوں نے سیڑھیاں لگا کر نیچے اتارا۔
یو ایس نیشنل ٹرانسپورٹیشن سیفٹی بورڈ (NTSB) کے 16 تفتیش کاروں کی ایک ٹیم نے آج منگل کو حادثے کی جگہ پر تحقیقاتی کارروائی شروع کر دی ہے، حادثے والی ریلوے لائن پر ٹرین سروس بھی کئی دنوں کے لیے بند کر دی گئی ہے۔
