کراچی: صوبائی وزیر توانائی سندھ امتیاز شیخ نے کراچی میں بجلی کی غیر اعلانیہ لوڈ شیڈنگ کا نوٹس لیتے ہوئے کے الیکٹرک سے رابطہ کیا اور کہا کہ لوڈ شیڈنگ سے امن و امان کی صورتحال خراب ہو رہی ہے۔
تفصیلات کے مطابق وزیر توانائی سندھ امتیاز شیخ نے کراچی میں بجلی کی غیر اعلانیہ لوڈ شیڈنگ کا نوٹس لیتے ہوئے کے الیکٹرک کے سی ای او سے رابطہ کیا۔
امتیاز شیخ کا کہنا تھا کہ لوڈ شیڈنگ نے عوام کی زندگی اجیرن کردی ہے، لوڈ شیڈنگ سے امن و امان کی صورتحال خراب ہو رہی ہے۔
انہوں نے کہا کہ وفاقی حکومت نیپرا سے منظور سبسڈیز کی رقم کی فوری ادائیگی کرے اور کے الیکٹرک ہنگامی بنیادوں پر غیر اعلانیہ لوڈ شیڈنگ کا خاتمہ کرے۔
امتیاز شیخ نے وزیر اعظم اور وزیر خزانہ سے کے الیکٹرک کے بقایا جات کی ادائیگی کی اپیل بھی کی۔
خیال رہے کہ آج کراچی کے علاقے ماڑی پور میں لوڈ شیڈنگ سے تنگ آ کر عوام سڑکوں پر نکل آئی اور ٹریفک بلاک کردیا جس پر پولیس نے بدترین لاٹھی چارج کیا۔
