امریکہ میں مادہ ریچھ اپنے بچے کے ہمراہ گھر میں داخل ہوکر کچن میں چلی آئی، دونوں ماں بیٹے نے مل کر پورا ڈونٹس کا ڈبہ کھا لیا۔
مغربی امریکی ریاست کیلیفورنیا میں ایک عجیب و غریب واقعہ پیش آیا جہاں گھر مکینوں کو اس وقت خوفناک صورتحال کا سامنا کرنا پڑا جب انہوں نے گھر میں ریچھ کو دیکھا۔
ہوا کچھ یوں کہ ایلس ٹیلر نامی خاتون اپنے گھر کے کاموں میں مصروف تھیں اس دوران انہیں کچن سے کچھ عجیب سی ٓوازیں سنائی دیں۔
پہلے تو خاتون نے ان آوازوں کو درگزر کیا لیکن کھٹ پٹ کی آوازیں مسلسل آنے پر انہوں نے کچن کا رخ کیا اور دروازے پر پہنچ کر ہکا بکا رہ گئیں۔
ایلس ٹیلر نے دیکھا کہ کہ ایک مادہ ریچھ اور اس کا بچہ کچن میں موجود ہیں اور ڈائننگ ٹیبل پر رکھے ڈونٹس کے ڈبے پر ہاتھ صاف کررہے ہیں۔
ایلس نے ان دونوں کو ڈرانے اور بھگانے کیلئے کچھ اونچی آوازیں نکالیں جس کے بعد ریچھ اور اس کا بچہ کچن کی کھڑکی سے اسی طرح واپس چلے گئے جیسے وہاں سے داخل ہوئے تھے۔
اس واقعے کی حیرت انگیز کی بات یہ بھی ہے کہ یہ واقعہ دوسری بار پیش آیا تھا کہ وہی ریچھ ایک بار پھر اس کے گھر میں پہلے بھی داخل ہوئے تھے۔
