پاکستانی فلموں اور ڈراموں کی خوبرو اداکارہ مایا علی نے حمزہ شہباز کے دوبارہ وزیر اعلیٰ پنجاب منتخب ہونے پر مختصر تبصرہ کیا ہے۔
اپنے آفیشل انسٹا گرام اکاؤنٹ پر مایا علی نے اسٹوری کے ذریعے اے آر وائی نیوز چینل کا اسکرین شاٹ پوسٹ کیا جس میں ڈپٹی اسپیکر پنجاب اسمبلی کی رولنگ ہے۔
اداکارہ نے اسٹوری پر لکھا: ’یہ انصاف کے ساتھ اور سسٹم کے ساتھ ہوگیا۔ لٹیرے لیڈرز نہیں بن سکتے‘۔
مایا علی سوشل میڈیا پر کافی متحرک رہتی ہیں اور اکثر سیاسی اور ملکی معاملات پر اپنے خیالات کا اظہار کرتی ہیں۔
اس سے قبل انہوں نے بجلی کی لوڈ شیڈنگ پر اپنے ردعمل کا اظہار کرتے ہوئے انسٹا گرام اسٹوری پر اندھیرے میں ٹمٹماتی ہوئی موم بتی کی ویڈیو شیئر کی تھی اور لکھا تھا: ’جب آپ کے پاس یو پی ایس چارج کرنے کے لیے بھی بجلی نہ ہو‘۔
مایا علی کے مداحوں کی تعداد لاکھوں میں ہے۔ انہوں نے اے آر وائی ڈیجیٹل کے ڈرامے ’پہلی سی محبت‘ میں ’رخشی‘ کا کردار نبھایا۔
