کراچی: صوبہ سندھ کے دارالحکومت کراچی میں طوفانی بارشوں کے بعد شہر کا بڑا حصہ زیر آب آچکا ہے، یوسف گوٹھ کا علاقہ مکمل طور پر زیر آب آگیا جس کے بعد وہاں موجود 300 کے قریب خاندان پھنس گئے۔
تفصیلات کے مطابق کراچی کا علاقہ سرجانی ٹاؤن یوسف گوٹھ بارش کے پانی میں ڈوب گیا جس کے بعد ایدھی کی خصوصی ٹیمیں شہریوں کی مدد کے لیے پہنچ گئیں۔
ریسکیو حکام کا کہنا ہے کہ 250 سے 300 خاندان پانی میں پھنسے ہوئے ہیں۔ علاقے میں 4 سے 5 فٹ پانی جمع ہے، سینکڑوں گھروں میں بارش کا پانی داخل ہوچکا ہے۔
ریسکیو حکام کے مطابق مسلسل بارشوں کی وجہ سے علاقہ مکمل طور پر زیر آب آچکا ہے۔
خیال رہے کہ کراچی میں گزشتہ روز سے اب تک 200 ملی میٹر سے زائد بارش ریکارڈ کی گئی ہے جس کے باعث پورے شہر میں اربن فلڈنگ کی صورتحال ہے۔
متعدد سڑکوں پر کئی فٹ پانی کھڑا ہے جبکہ کئی علاقوں میں گھروں میں بھی پانی داخل ہوچکا ہے۔
