لاہور : وزیراعظم شہباز شریف اور وفاقی کابینہ کو عہدے سے ہٹانے کے لیے درخواست پررجسٹرار آفس نےاعتراض عائد کردیا۔
تفصیلات کے مطابق رجسٹرار آفس لاہورہائی کورٹ نے وزیراعظم شہباز شریف اور وفاقی کابینہ کوعہدے سے ہٹانے کے لیے درخواست پر اعتراض عائد کردیا۔
رجسٹرار آفس نے دستاویزات کی مصدقہ نقول نہ ہونے کا اعتراض عائد کیا۔
درخواست تحریک انصاف کے رہنما عندلیب عباس اور حسان نیازی نے دائر کی ، جس میں موقف اختیار کیا گیا ہے کہ وزیر اعظم شہباز شریف کے خلاف منی لانڈرنگ کے کیسز زیر سماعت ہیں، شہباز شریف اور انکی کابینہ نے لندن دورے کے دوران اشتہاری ملزمان سے ملاقات کی۔
درخواست میں کہا ہے کہ شہباز شریف نے ترکی میں اشتہاری سلمان شہباز کو سرکاری دورے میں شامل کیا،سلمان شہباز اور انکی اہلیہ کو سرکاری دورے کرانا قانون کی صریحاً خلاف ورزی ہے۔
درخواست گزار کا کہنا تھا کہ شہباز شریف اپنے اختیارات کا غلط استعمال کر کے آئین کی خلاف ورزی کر رہے ہیں،لاہور ہائیکورٹ شہباز شریف ، ان کی کابینہ کو عہدوں سے ہٹانے اور ملک میں نگران وزیر اعظم تعینات کرنے کا حکم دے۔
