کراچی: وزیر اعلیٰ سندھ مراد علی شاہ نے وفاق سے آفت زدہ علاقوں میں زرعی قرضوں کی وصولی مؤخر کرنے کی اپیل کر دی ہے۔
تفصیلات کے مطابق آج جمعرات کو وزیر اعظم شہباز شریف کی زیر صدارت بارشوں کے نقصانات سے متعلق اجلاس منعقد ہوا، جس میں وزیر اعلیٰ سندھ مراد علی شاہ کی اجلاس میں بذریعہ ویڈیو لنک شرکت کی۔
انھوں نے کہا کہ سندھ میں بارشوں سے ضائع ہونے والی جانوں کے لیے وفاق معاوضہ دینے میں مدد کرے، بلوچستان کے ساتھ بچاؤ بندوں کو مضبوط کرنے کی بھی ضرورت ہے، ان کی مضبوطی سندھ میں پانی آنے سے روکے گی۔
وزیر اعلیٰ نے اپیل کی کہ کراچی میں بڑے برساتی نالوں کی اپ گریڈیشن کے لیے وفاقی حکومت مدد کرے، اور صوبے میں آفت زدہ علاقوں میں زرعی قرضوں کی وصولی ایک سال کے لیے مؤخر کریں، سندھ حکومت بھی بارشوں سے متاثرہ علاقوں کو آفت زدہ قرار دینے جا رہی ہے۔
مراد علی شاہ نے بتایا کہ لیفٹ بینک آؤٹ فال ڈرین کی گنجائش بڑھانے کی ضرورت ہے، اور رائیٹ بینک آؤٹ فال ڈرین کو ترجیحی بنیاد پر مکمل کیا جائے۔
انھوں نے کہا گڈو بیراج میں اس وقت نچلے درجے کا سیلاب ہے، اور وہاں سے 283.4 کیوسک کا ریلا گزر رہا ہے، اگلے 24 گھنٹوں میں گڈو بیراج پر 290 سے 340 کیوسک پانی گزرنے کی توقع ہے، جب گڈو بیراج میں پانی 400 کیوسک سے بڑھتا ہے تو کچے سے لوگوں کو منتقل کیا جاتا ہے۔
وزیر اعلیٰ کے مطابق بلوچستان میں مزید بارشیں ہوں گی جس سے حب ڈیم پر دباؤ بڑھے گا، اس سے کراچی کے غربی علاقوں میں نقصان کا خدشہ ہے، کھیرتھر رینج میں مزید بارشوں سے قمبر، شہداد کوٹ، دادو، جامشورو میں پانی کا بہاؤ بڑھ جائے گا۔
انھوں نے اپیل کی کہ وفاق آفت زدہ علاقوں میں سندھ کی مدد کرے اور بچاؤ بندوں کو مضبوط بنائے، تاکہ صوبے میں سیلابی پانی کو روکا جا سکے۔
