اسلام آباد: سپریم کورٹ آف پاکستان نے وزیرِاعلیٰ سندھ مراد علی شاہ کی نااہلی سے متعلق نظرِثانی کی درخواست سماعت کے لیے مقررکردی۔
تفصیلات کے مطابق عدالتِ عظمیٰ کے جسٹس عمرعطا بندیال کی سربراہی میں تین رکنی بینچ دو اگست کو وزیرِاعلیٰ سندھ مراد علی شاہ کی نااہلی سے متعلق نظرِثانی کی درخواست کی سماعت کرے گا۔
جسٹس منصورعلی شاہ اور جسٹس منیب اختر بینچ میں شامل ہونگے، سپریم کورٹ نے نظرِ ثانی کی درخواست پر وزیرِاعلیٰ سندھ مراد علی شاہ سمیت تمام فریقین کو نوٹس جاری کردئیے ہیں۔
روشن علی بڑورو نامی شہری نے اقامے اور دہری شہریت پر مراد علی شاہ کی نااہلی کی استدعا کررکھی ہے، اس سے قبل عدالتِ عظمیٰ نے مراد علی شاہ کی نااہلی کی مرکزی درخواست خارج کر دی تھی۔
دوسری جانب لاہور ہائی کورٹ میں وزیراعظم شہباز شریف کی نااہلی کیلئےدرخواست سماعت کے لئے مقرر کردی گئی ہے۔
لاہور ہائی کورٹ میں جسٹس شجاعت علی خان یکم اگست کو سماعت کریں گے، درخواست پی ٹی آئی رہنماؤں عندلیب عباس اورحسان نیازی کی جانب سے دائر کی گئی ہے۔
درخواست میں مؤقف اختیار کیا گیا ہے کہ شہباز شریف نے بطور وزیراعظم قانون، دستور کے مطابق ملک چلانے کا حلف لیا، شہباز شریف نے حلف اٹھایا کہ ملکی امورپر خاندانی معاملات کو اثرانداز نہیں ہونے دیں گے۔
یہ بھی پڑھیں: نااہلی کی درخواست : شہباز شریف نئی مشکل میں پھنس گئے
درخواست میں کہا گیا کہ وزیراعظم لندن میں سزا یافتہ نواز شریف ،سلیمان شہباز اور اسحاق ڈار سے ملے، شہباز شریف سلیمان شہباز کوسرکاری وفد میں شامل کرکے یو اے ای ،ترکی لے گئے۔
درخواست گزار کا کہنا تھا کہ شہبازشریف نے سزا یافتہ افراد سے ملاقات کرکے حلف کی پاسداری نہیں کی ، میاں شہباز شریف نے آفیشل سیکرٹ ایکٹ کی خلاف ورزی کی ، استدعا ہے کہ عدالت وزیراعظم شہباز شریف کو نااہل قرار دے۔
