کراچی : پاکستان شوبز کی نامور اداکارہ صبا فیصل نے کہا ہے کہ ان کے شوہر آج تک ان سے عشق کرتے ہیں، اسی لیے یہ محبتیں آج بھی قائم ہیں۔
یہ باتیں انہوں نے اے آر وائی زندگی کے پروگرام ’’زندگی ودھ ساجد حسن‘‘میں خصوصی گفتگو کرتے ہوئے کہیں۔
اپنی زندگی کے گزرے ہوئے واقعات، ماضی اور شادی کے حوالے سے گفتگو میں ان کا کہنا تھا کہ ان کی شادی ان کے ماموں زاد کزن سے ہوئی۔
صبا نے بتایا کہ مجھے فیصل سعید نے پرپوز کیا تھا کیونکہ وہ مجھ کو بے حد پسند کرتے تھے بلکہ میرے ساتھ ان کا آج بھی وہی تعلق ہے یہی وجہ ہے کہ محبتیں آج بھی قائم ہیں۔
ان کا کہنا تھا کہ فیصل بہت اصول پسند انسان ہیں کوئی بھی چیز اپنی جگہ پر موجود نہ ہو اور وقت پر نہ ملے تو اس پر ناپسندیدگی کا اظہار کرتے ہیں۔
واضح رہے کہ اداکارہ صبا فیصل 31 جنوری 1958ء کو پاکستان کے شہر کراچی میں پیدا ہوئیں۔ انہوں نے اپنے کیریئر کا آغاز بطور ٹی وی میزبان کیا اور بعد ازاں اداکاری سے شعبے سے وابستہ ہوگئیں۔
پاکستانی ڈراموں میں کبھی ماں تو کبھی ساس کے روپ میں دور حاضر کا ایک مقبول ترین چہرہ صبا فیصل کا ہے جو بیس سال پہلے اپنی پہلے ہی ڈرامے میں ماں کا کردار ملنے پر گھبرائیں تو ضرور لیکن پھر یہی ان کی پہچان بن گیا۔
انہوں نے فیصل سعید سے شادی کی، وہ تین بچوں کی والدہ ہیں، وہ ڈراموں میں منفی اور مثبت دونوں طرح کے کرداروں میں نظر آتی ہیں کبھی وہ ایک سخت گیر ساس بن جاتی ہیں اور کبھی انتہائی محبت کرنے والی سادہ لوح ماں کے کردار میں نظر آتی ہیں۔
صبا فیصل پاکستان کی پہلی سینئر اداکارہ ہیں جنہیں انسٹاگرام پر ایک ملین سے زائد صارفین نے فالو کیا ہوا ہے۔
