سکھر: عوام نے حکومت سے اے آر وائی چینل بحال کرنے کا مطالبہ کر دیا ہے۔
تفصیلات کے مطابق اے آر وائی نیوز کی بندش پر صحافتی تنظیموں کے ساتھ ساتھ ملک بھر میں شہری بھی سراپا احتجاج گئے ہیں۔
شہریوں کا کہنا ہے کہ جو چینل حق اور سچ بات کرتا ہے اسے بند کر دیا جاتا ہے، 90 فی صد لوگ اے آر وائی دیکھتے ہیں، اسے پسند کرتے ہیں، اے آر وائی ہمارا پسندیدہ چینل ہے۔
نشریات کی بندش: اے آر وائی کی لائیو ٹرانسمیشن یہاں دیکھیں
شہریوں نے سوال اٹھایا کہ ایک ہی چینل ہے جو ہم تک سچ پہنچاتا ہے، اگر یہ بھی بند کر دیں گے تو کیا دیکھیں؟ وہ جو حکومت دکھانا چاہتی ہے؟
اے آر وائی نیوز کی بندش کے خلاف شیخوپورہ اور سکھر میں بھی شہری سراپا احتجاج بن گئے، شہریوں نے سکھر میں ملٹری روڈ پر اے آر وائی نیوز کی نشریات بند کرنے پر احتجاجی مظاہرہ کیا۔
شہریوں نے اے آر وائی کی بندش نامنظور کے نعرے لگائے، اور پیمرا کی جانب سے اے آر وائی نیوز کی نشریات کی بندش حق اور سچ کی آواز دبانے کے مترادف قرار دیا۔
احتجاج کرنے والے شہریوں نے میڈیا سے گفتگو کرتے ہوئے کہا کہ اے آر وائی نیوز نے ہمیشہ مظلوموں کی آواز کو اعلیٰ ایوانوں تک پہنچایا ہے، اے آر وائی نیوز کو حق اور سچ دکھانے کی سزا دی جا رہی ہے، حکومت کی نا اہلی دکھانے پر اے آر وائی نیوز کی نشریات کو پیمرا کے ذریعے بند کروایا گیا ہے۔
شہریوں کا کہنا تھا کہ اے آر وائی نیوز پاکستانی عوام کا ترجمان ہے، حکومت نے اے آر وائی نیوز اس وجہ سے بند کیا ہے تاکہ وہ حکومتی کرتوت عوام کو نہ دکھا سکے، لیکن ہم یہ کبھی برداشت نہیں کریں گے کہ عوام کی آواز بننے والے چینل کو حکومت بند کرے۔
انھوں نے کہا کہ اگر اے آر وائی نیوز کی نشریات بحال نہیں کی گئی تو ہم روز کی بنیاد پر حکومت کے خلاف احتجاجی مظاہرہ کریں گے۔
