وزیرداخلہ نے ایم کیو ایم کو تحفظات دور کرانے کی یقین دہانی کرادی، چوہدری نثار کا کہنا ہے کہ دہشتگردوں کی سرکوبی تک آپریشن جاری رہے گا، ایم کیو ایم اور ن لیگ کا سیاسی روابط بڑھانے پر بھی اتفاق کیا گیا۔
گورنرہاؤس کراچی میں متحدہ قومی موومنٹ کے وفد نے وفاقی وزیرداخلہ چوہدری نثارعلی خان سے ملاقات کی، ملاقات میں شہر کی امن و امان کی صورتحال سمیت کراچی میں جاری آپریشن پر بات چیت کی گئی۔
ذرائع کے مطابق ایم کیو ایم کے وفد نے فاروق ستار کی قیادت میں وفاقی وزیر کو تحفظات سے آگاہ کیا، چوہدری نثار نے ایم کیو ایم کے تحفظات کو دورکرنے کی یقین دہانی کراتے ہوئے کہا کہ کراچی میں آپریشن جرائم پیشہ عناصرکے خلاف ہے، کسی خاص جماعت کے خلاف نہیں، آپریشن کے تیسرے مرحلےکو مزید مربوط اور فعال بنایا جائے گا۔
گورنرسندھ ڈاکٹرعشرت العباد سے ملاقات میں شہر میں جاری آپریشن کے نتیجے میں ملنےوالی کامیابیوں پر بھی گفتگو کی گئی، چوہدری نثار نے کہا کہ کراچی میں امن و امان اولین ترجیح ہے، دہشت گردوں کی مکمل سرکوبی تک آپریشن جاری رہے گا۔
ملاقات میں مشترکہ سیاسی صورتحال پر حکمت عملی بنانے پر بھی غورکیا گیا، دونوں سیاسی جماعتوں نے مستقبل میں روابط بڑھانے پر بھی اتفاق ہوا۔
