اسلام آباد: مسلم لیگ (ق) کے رہنما مونس الہیٰ نے وفاقی وزیر قانون پر مقدمے کے اندراج پر اپنے ردعمل کا اظہار کیا ہے۔
تفصیلات کے مطابق سماجی رابطے کی ویب سائٹ ٹوئٹر پر مونس الہٰی نے رانا ثنا اللہ کے خلاف درج مقدمے کا عکس شیئر کرتے ہوئے لکھا کہ "رانا ثناء اللہ آپ ہمارے وزیراعظم عمران خان کے خلاف جھوٹے مقدمے بناتے ہو، آپ کے خلاف پاکستانی عوام نے سچا مقدمہ بنادیا ہے”۔
انہوں نے اپنے ٹوئٹ میں جلد وفاقی وزیر داخلہ کی گرفتاری کا عندیہ دیتے ہوئے لکھا ” گرفتاری عنقریب۔”
آپ @RanaSanaullahPK ہمارے PM @ImranKhanPTI کے خلاف جھوٹے مقدمے بناتے ہو۔ آپ کے خلاف پاکستانی عوام نے سچا مقدمہ بنایا ہے ۔ گرفتاری عنقریب pic.twitter.com/oZmGS0GEoZ
— Moonis Elahi (@MoonisElahi6) August 25, 2022
واضح رہے کہ اب سے تھوڑی دیر قبل وفاقی وزیر برائے داخلہ رانا ثنا اللہ کے خلاف گجرات میں مقدمہ درج کیا گیا ہے۔
اے آر وائی نیوز کے مطابق تھانہ گجرات میں شہری شہکاز اسلم کی جانب سے دائر کردہ درخواست پر وزیر داخلہ رانا ثنا اللہ کے خلاف ایف آئی آر درج کی گئی۔
یہ بھی پڑھیں: فوج مخالف بیانات پر نواز شریف و دیگر کیخلاف مقدمے کی درخواست جمع
ایف آئی آر کے متن کے مطابق رانا ثنا نے انتظامیہ، عدلیہ اور دیگر سرکاری ملازمین کو دھمکیاں دیں۔
مقدمے کی درخواست میں کہا گیا کہ وزیر داخلہ رانا ثنا کے خلاف مقدمہ درج کرکے کارروائی کی جائے انہوں نے عدلیہ کے گھیراؤ، ججوں کو آئینی کام سے روکنے کی دھمکی دی۔
مقدمہ متن کے مطابق رانا ثنا نے کہا کہ عدالت اورہر اس ججز کا گھیراؤ کریں گے جو ایجنڈے کو پروان چڑھائے گا۔